|
MƏHKƏMƏ QƏRARLARININ İCRASI İLƏ BAĞLI QƏTİ TƏDBİRLƏR GÖRÜLÜR
Məhkəmə-Hüquq Şurasının növbəti iclasında məhkəmə fəaliyyətinin təkmilləşdirilməsi üzrə əlavə tədbirlər, o cümlədən məhkəmələrdə keçirilmiş monitorinqlərin nəticələri, habelə hakimliyə namizədlərlə imtahanların təşkili və hakimlər haqqında başlanılmış intizam icraatlarına baxılmışdır.
 İclasda çıxış edən Məhkəmə-Hüquq Şurasının sədri, ədliyyə naziri Fikrət Məmmədov ölkə prezidenti cənab İlham Əliyevin məhkəmə sisteminin müasirləşdirilməsi üzrə tapşırıqlarının icrası ilə bağlı görülən işləri qeyd etmiş, yeni yaradılan məhkəmələrin fəaliyyətə başlaması üçün təşkilati tədbirlər barədə məlumat vermiş, qarşıda duran vəzifələrə toxunmuşdur.
Həmçinin, iclasda ədalət mühakiməsinin səmərəliliyinin artırılması üzrə Avropa Şurasının tövsiyələrinə əsasən hazırlanmış bəzi qanunvericilik aktlarının layihələri, habelə məhkəmə sisteminin daha da təkmilləşdirilməsi üzrə tədbirlər nəzərdən keçirilmiş, ədliyyə nazirliyi tərəfindən aparılmış məhkəmə monitorinqlərinin nəticələri müzakirə edilmişdir.
Qeyd olunmuşdur ki, dövlət başçısının məhkəmələrdə icra və əmək intizamına ciddi əməl edilməsi, süründürməçilik hallarının aradan qaldırılması barədə tapşırıqlarının icrası üzrə son dövrlər Ədliyyə Nazirliyi və Məhkəmə-Hüquq Şurası tərəfindən məhkəmələrdə monitorinqlər keçirilmiş, aşkar edilmiş pozuntular hakimlərin iştirakı ilə geniş müzakirə olunmuş, icra və əmək intizamının pozulması hallarına yol verdiklərinə görə bir qrup hakim barədə intizam icraatları başlanılmışdır. Görülmüş tədbirlər öz müsbət bəhrəsini vermiş və yol verilən nöqsanların qarşısı alınmışdır.
Məhkəmə-Hüquq Şurasının iclasında hakimlər barədə intizam icraatlarına baxılaraq fəaliyyətlərində qanunvericiliyin tələblərini,
|  | o cümlədən vətəndaşların mülkiyyət hüquqlarını pozduqlarına, işlərə süründürməçiliklə, xüsusi geyimdə olmadan, aşkarlıq prinsipininə zidd olaraq xidməti kabinetlərdə baxdıqlarına və digər kobud qanun pozuntularına yol verdiklərinə görə Bakı şəhəri Yasamal rayon məhkəməsinin hakimi Şahin Adullayevə, Binəqədi rayon məhkəməsinin hakimi Əhməd Sarıyevə, Xətai rayon məhkəməsinin hakimi İsgəndər Qasımova, Gəncə şəhəri Nzami rayon məhkəməsinin hakimi Əliyar Qurbanova, Bakı iqtisad məhkəməsinin hakimi Maşallah Ələkbərova töhmət verilmiş, Füzuli-Qubadlı hərbi məhkəməsinin hakimi Elnur Cəbiyevə irad tutulmuşdur.
Eyni zamanda iclasda hakimliyə namizədlər üçün ilkin hazırlıq kursunun və hakim vəzifələrinə yeni namizədlərin sənədlərinin qəbulu nəticələri barədə Hakimlərin Seçki Komitəsinin sədri İman Nağıyevin məlumatı dinlənilmişdir.
Müasir tədris üsullarından istifadə edilməklə 5 ay müddətində keçirilən ilkin hazırlıq  kursunun tədris proqramının nüfuzlu beynəlxalq ekspertlərin iştirakı ilə hazırlanması, namizədlərin hakim olmaq üçün lazımi biliyə və peşə hazırlığına yiyələnməsinə xüsusi diqqət yetirilərək, proqrama ən aktual, o cümlədən insan haqları, korrupsiya, məhkəmə etikası, hakimin davranışı, məhkəmədə işin səmərəli təşkili və digər məsələlərə dair mövzuların daxil edilməsi, 2 aydan çox müxtəlif məhkəmələrdə staj keçmənin təşkil olunması qeyd edilmişdir. Kurslarda nüfuzlu xarici mütəxəssislərin, yüksək məhkəmə hakimlərinin, görkəmli alimlərin, zəngin biliyə və təcrübəyə malik olan şəxslərin mühazirələri təşkil olunmuşdur.
 İlkin tədris kursunun müvəffəqiyyətlə başa çatması iclasda vurğulanaraq onun nəticələri üzrə namizədlərlə şəffaf şəraitdə, müşahidəçilərin iştirakı ilə imtahanların və yekun müsahibənin keçirilməsi məsələlərinə baxılmışdır.
Tədbirdə hakimliyə namizədlərin növbəti sənəd qəbulunun başa çatması, 700-dən çox şəxsin öz namizədliyini irəli sürməsi bildirilmiş, namizədlərlə test imtahanlarının beynəlxalq standartlara uyğun, tam şəffaf şəraitdə keçirilməsi üzrə təşkilati tədbirlər müzakirə olunmuşdur.
01/08/2006
|
|
|
|
 |
|
|
Copyright Ədliyyə Nazirliyi All Rights Reserved 2003 |
|
|
